ನೋಯ್ಡಾ: ಸರ್ಕಾರಿ ಕಚೇರಿಗೆ ಕೆಲಸದ ಮೇಲೆ ಬಂದ ವೃದ್ಧರನ್ನು ಅಲ್ಲಿನ ನೌಕರರು ಬೇಜವಬ್ದಾರಿಯಿಂದ ವರ್ತಿಸಿ, ಸುಮಾರು 20 ನಿಮಿಷಗಳ ಕಾಲ ಕಾಯುವಂತೆ ಮಾಡಿದ ವಸತಿ ಪ್ಲಾಟ್ ವಿಭಾಗದ 16 ಸಿಬ್ಬಂದಿಗಳಿಗೆ ಉತ್ತರ ಪ್ರದೇಶದ ನೋಯ್ಡಾ ಪ್ರಾಧಿಕಾರದ ಸಿಇಒ (CEO) ವಿಶಿಷ್ಟ ಶಿಕ್ಷೆ ವಿಧಿಸಿದ್ದು, ಸಾಮಾಜಿಕ ಜಾಲತಾಣದಲ್ಲಿ Video ವೈರಲ್ ಆಗಿದೆ.
ಪ್ರಾಧಿಕಾರದ ಸೆಕ್ಟರ್ 6 ಕಚೇರಿಯಲ್ಲಿ ಸೋಮವಾರ ಈ ಘಟನೆ ನಡೆದಿದ್ದು, ನೋಯ್ಡಾ ಪ್ರಾಧಿಕಾರದ ಸಿಇಒ ಡಾ.ಲೋಕೇಶ್ ಎಂ ಅವರ ಕ್ರಮ ಸಾಮಾಜಿಕ ಜಾಲತಾಣದಲ್ಲಿ ಪ್ರಶಂಸೆಗೆ ಕಾರಣವಾಗಿದೆ.
2023 ರಲ್ಲಿ ನೋಯ್ಡಾ ಪ್ರಾಧಿಕಾರದ ಉಸ್ತುವಾರಿ ವಹಿಸಿಕೊಂಡ 2005-ಬ್ಯಾಚ್ ಐಎಎಸ್ ಅಧಿಕಾರಿ ಡಾ. ಲೋಕೇಶ್ ಅವರು,, ಕಚೇರಿಯ ಆವರಣದಾದ್ಯಂತ ಅಳವಡಿಸಲಾಗಿರುವ 65 ಸಿಸಿಟಿವಿ ಕ್ಯಾಮೆರಾಗಳ ಜಾಲವನ್ನು ಬಳಸಿಕೊಂಡು ಕಚೇರಿಯನ್ನು ನಿಯಮಿತವಾಗಿ ಮೇಲ್ವಿಚಾರಣೆ ಮಾಡುತ್ತಾರೆ.
ಸೋಮವಾರ, ದೃಶ್ಯಾವಳಿಗಳನ್ನು ಪರಿಶೀಲಿಸುವಾಗ, ಅವರು ಸಹಾಯ ಪಡೆಯದೆ ಕೌಂಟರ್‌ನಲ್ಲಿ ನಿಂತಿರುವ ವೃದ್ಧರನ್ನು ಗಮನಿಸಿದರು. ಕೂಡಲೇ ಹಿರಿಯ ನಾಗರಿಕರು ಸಮಸ್ಯೆಗೆ ಆದ್ಯತೆ ನೀಡುವಂತೆ ಸಿಬ್ಬಂದಿಗೆ ಸೂಚನೆಗಳನ್ನು ಕಳುಹಿಸಿದರೂ ಸಿಬ್ಬಂದಿಗಳು ನಿರ್ಲಕ್ಷ್ಯ ತೋರಿದ್ದಾರೆ.
ನೌಕರರಿಂದ ಸ್ಪಂದನೆ ಸಿಗದ ಕಾರಣ ಹತಾಶರಾದ ಡಾ.ಲೋಕೇಶ್ ಖುದ್ದು ವಿಭಾಗಕ್ಕೆ ಭೇಟಿ ನೀಡಿದ್ದು, ಸಿಬ್ಬಂದಿ ನಿರ್ಲಕ್ಷಿಸುತ್ತಿರುವುದು ಕಂಡು ಬಂದಿದೆ. ಆಸ್ತಿ ಹಸ್ತಾಂತರ ವಿಚಾರ ತಿಳಿಸಲು ಬಂದಿದ್ದ ವಯೋವೃದ್ಧರು ಅನಗತ್ಯವಾಗಿ ಕಾದು ನಿಂತಿದ್ದರು ಎನ್ನಲಾಗಿದೆ.
ಇದರಿಂದ ಕೆರಳಿದ ಸಿಎಇಒ ಡಾ.ಲೋಕೇಶ್ ಕೌಂಟರ್‌ನಲ್ಲಿದ್ದ ಎಲ್ಲಾ 16 ನೌಕರರನ್ನು 20 ನಿಮಿಷಗಳ ಕಾಲ ನಿಂತು ಕೆಲಸ ಮಾಡಲು ಆದೇಶಿಸಿದರು. ನಿಂತು ಕೆಲಸ ಮಾಡಿದಾಗ ಮಾತ್ರ ವೃದ್ಧರು ಪಡುತ್ತಿರುವ ಕಷ್ಟ ಅರ್ಥವಾಗುತ್ತದೆ ಎಂದು ಸಿಬ್ಬಂದಿಗೆ ತಿಳಿಸಿದರು.
ಸಾರ್ವಜನಿಕ ಸೇವಕರು ಹೆಚ್ಚು ಗಮನ ಮತ್ತು ಗೌರವದಿಂದ ಇರಬೇಕಾದ ಅಗತ್ಯವನ್ನು ಸಿಇಒ ನೌಕರರಿಗೆ ಹೇಳಿದರು. ಸಾರ್ವಜನಿಕ ಸೇವೆಯು ಈ ರೀತಿ ಕಾರ್ಯನಿರ್ವಹಿಸಬಾರದು, ಸಾರ್ವಜನಿಕರಿಗೆ ಸಹಾಯ ಮಾಡಲು ಮತ್ತು ಅವರ ಸಮಸ್ಯೆಗಳನ್ನು ಪರಿಹರಿಸಲು ನಾವು ಇಲ್ಲಿದ್ದೇವೆ ಎಂದು ಅವರು ಹೇಳಿದರು.
ಸಿಇಒ ಅವರ ನಿರ್ದೇಶನವನ್ನು ಅನುಸರಿಸಿ ಮಹಿಳೆಯರು ಸೇರಿದಂತೆ ಉದ್ಯೋಗಿಗಳು ನಿಂತುಕೊಂಡು ಸಂದರ್ಶಕರಿಗೆ ಹಾಜರಾಗುವುದು ವಿಡಿಯೋದಲ್ಲಿ ಸೆರೆಯಾಗಿದೆ.
ಸಿಇಒ ಅವರ ನಿರ್ಣಾಯಕ ಕ್ರಮ ಸಾಮಾಜಿಕ ಜಾಲತಾಣದಲ್ಲಿ ಪ್ರಶಂಸೆಗೆ ಕಾರಣವಾಗಿದೆ, ಸಿಬ್ಬಂದಿಯನ್ನು ಹೊಣೆಗಾರರನ್ನಾಗಿ ಮಾಡಿದ್ದಕ್ಕಾಗಿ ನೆಟ್ಟಿಗರು ಶ್ಲಾಘಿಸಿದ್ದಾರೆ. ಅನೇಕರು ಈ ಶಿಕ್ಷೆಯನ್ನು ಸರ್ಕಾರಿ ನೌಕರರಲ್ಲಿ ಜವಾಬ್ದಾರಿಯ ಪ್ರಜ್ಞೆಯನ್ನು ತುಂಬಲು ಅಗತ್ಯವಾದ ಹೆಜ್ಜೆ ಎಂದು ಪರಿಗಣಿಸಿದ್ದಾರೆ.